Polis ligsan patay

CEBU, Philippines - Usa ka polis sa lungsod sa Carmen naligsan ug namatay didto sa highway sa barangay Taytay, lungsod sa Liloan , sa miaging adlaw.

Ang biktima mao si PO1 Ricky Linawagan , hingkod, nga taga barangay Jubay, lungsod sa Liloan ug usa ka jailer sa Carmen Police Station.

Si SPO2 Simplicio Gibo, hepe sa kapolisan sa Carmen mibutyag sa Banat News nga ang namatyan ni Linawagan mao ang pagkaguyod niini sa usa ka van nga iya sa Dranex Distributor nga nagbase sa dakbayan sa Danao.

Hinuon ang drayber sa maong van nga si Cosme de Gracia, 21, nga taga Tabunok, dakbayan sa Talisay nagtingkagol na karon sa prisohan sa Carmen human kini motahan sa iyang kaugalingon ngadto sa otoridad.

Sumala kang SPO2 Gibo nga si Linawagan nagsakay sa iyang motorsiklo paingon sa ilang buhatan aron mo-duty, dihang pag-abot sa Taytay, ang gisundan niyang awto mikalit og hunong.

Dihang mihana siya paglusot, mihunong usab og kalit ang gisundan niyang traysikol hinungdan nga nababag siya sa karsada apan nataymingan usab nga may nagbaguros nga van nga nagsunod kaniya ug nadagit sa ligid sa kilid sa van nga walay kalibotan ang drayber, unya naguyod siya sa gilay-ong 90 metros una pa mohunong ang maong van.

Gisuwayan og dala sa tambalanan si Linawagan apan nabugtoan gyud kini sa iyang kinabuhi.   (BANAT NEWS)