4 ka tanod sa Basak - San Nicolas nangulata

CEBU, Philippines - Labing minos upat ka mga barangay tanod sa Basak San Nicolas ning siyudad sa Sugbu ang posibleng masuspenso sa serbisyo tungod sa pagkulata niini sa ilang dinakpan niadtong miaging Hulyo 28 sa kaadlawon.

Ang biktima nga si James Junyl Vallejos nagpabilin pa karon sa Cebu City Medical Center (CCMC) ug gikatahong dunay mga bali sa iyang kalawasan.

Gawas sa pagkulata giingong gihapak usab og armas sa usa sa mga tanod ang tuong tampihak ni Vallejos hinungdan nga kini nakuyapan.

Matud pa ni barangay kapitan George Rama nga dili siya magduha-duha pagpahamtang og silot sa iyang mga sakop kung dunay reklamo nga ipasaka batok niini.

Nailhan ang mga tanod nga sila si Vic Consing, Leonilo Navarro, Guilberto Sismar ug Tito Alkuino nga maoy duty niadtong higayuna.

Desidido ang inahan sa biktima nga si Elsa Vallejos nga mosang-at og reklamo sa maong mga tanod aron kahatagan og hustisya ang gidangatan sa iyang anak.

Gikataho nga ang grupo ni Vallejos una nang nakakita og engkwentro dihang kini nakatumba og motor atol sa ilang pagpamauli gikan nga nag-inom hinungdan nga kini gigukod ug gidakop.   

Giimbestigar na usab ni kapitan Rama ang iyang mga tanod tungod sa maong hitabo ug lakip sa iyang gisusi mao ang pagbaton og armas sa pipila niini. (Elly Bolonos)     (BANAT NEWS)