Munisipyo sa San Fernando gilungkab

CEBU, Philippines - Tulo ka mga kawani sa munisipyo sa lungsod sa San Fernando, ipa-ubos sa imbestigasyon tungod sa pagkahanaw sa P50 mil cash human gilungkab ang buhatan sa Treasurer’s Office.

Si SPO1 Jovani Barcenas sa San Fernando Police Station nga gikahinabi sa Banat News nagkanayon nga ilang imbitahon karong alawa ang disbursing officer nga si Edcel Laguda ug ang laing duha pa ka kawani sa munisipyo nga sila Chariss Lapinid ug Marites Selma.

Matud pa ni SPO1 Barcenas nga nagtuo silang dunay inside job nga nahitabo sa maong pagpanglungkab kini human sa inisyal nga imbestigasyon nga way force of entry ang wala mailhing suspetsado nga nilungkab sa drawer ni Laguda.

Gipasabot niini nga si Laguda, pagka-ala 1:10 na sa hapon niadtong Sabado nagpa-blotter sa maong hitabo diin nianang pagka-alas 10:00 sa buntag sa samang adlaw gikawat ang yawe niini diha sa ilang panimalay sa barangay Panadtaran diin dili lang layo sa Police Station.

Apan si Barcenas nagkanayon nga wala magkadimao ang pamahayag ni Laguda ug wala magkatukma sa pamahayag nila ni Lapinid ug Selma niadtong Sabado.

Sumala pa niini nga dunay buslot ang pamahayag sa maong disbursing officer tungod kay buntag pa nahanaw ang yawe sa ilang buhatan ug wala gyud kini gi-report hangtud nga niabot nalang ang hapon dihang didto siya sa buhatan niini.

Dugang pa niini nga dihang gi-inspection ang buhatan niini yano ra kayong giabli sa wala mailhing kawatan ang drawer diin wala gyu'y nagkatag nga butang. – BANAT NEWS