7 ka barangay gihataya'g mga gamit ni Cuenco

CEBU, Philippines - Pito ka mga barangay sa habagatang distrito sa dakbayan sa Sugbo   gipanghatagan ni Kongresista Antonio Cuenco og mga lamesa, lingkuranan, ug mga tent niadtong Sabado sa hapon didto sa barangay Tisa.

Ang mga barangay nga nakadawat naglangkob   sa barangay Tisa, Guadalupe, Sapangdako, Basak-Pardo, Buot-Taup, Pung-ol Sibugay.

Si Cuenco mipasalig sa iyang mga konstituwente nga iyang ipadayag ang paghatag sa maong mga kagamitan matag duha ka semana hangtod maapuran ang tanang barangay diha sa iyang distrito.

Gipadayag niini nga bisan kun ginagmay lang mga proyekto nga mahatag sa barangay dako na kaayo kinig hinungdan nga wala na niya paabuta pang moduol ang mga opisyal sa barangay kun dili siya na mismo ang midunol kanila.

Hinuon giseguro lang una niya sa paghatag kadtong mga bukirang barangay diha sa iyang distrito ug dili mabalaka niini ang ubang barangay tungod kay iya   kining apuran sa mga kagamitan sa barangay.

Gawas niini, mipasalig usab si Cuenco nga ipadayon usab ang iyang paghatag og mga nagkadaiyang libro sa elementarya ug high school diha sa iyang distrito nga makatabang usab sa mga tinun-an.

Niadtong Sabado sa hapon si Cuenco mihatag usab og mga libro sa Tisa National High School mga mobalor ngadto na sa tunga sa milyon ka pesos. – BANAT NEWS