Kongresista ipatawag ni Vidal

CEBU, Philippines - Ipatawag ni Arsobispo   Ricardo Cardinal Vidal ang kongresista sa ikaupat nga distrito sa lalawigan.

Kini maoy gipahibalo sa country director sa Human Life International (HLI) nga si Dr. Rene Josef Bullecer human usab niini ikahinabi ang Arsobispo.

Matud ni Bullecer nga mangayo og katin-awan si Cardinal Vidal ngadto ni Kongresista Benhur Salimbangon labot sa giluwatang pamahayag niini sa media.

Nagkanayon ang country director sa HLI nga wala mahimuot ang Arsobispo human masayod nga padayong nipaluyo si Salimbangon sa Reproductive Health Bill.

Kini tungod kay giingong misaad na ang kongresista ngadto kang Cardinal Vidal nga dili na mosuporta sa nahisgutang kontrobersyal nga balaudnon.

“Nalain si Cardinal, ingon siya nga ako nang ipatawag (Salimbangon) kay misaad na ra ba na siya nga dili na mopaluyo ana. Unya sa newspaper baliktad iyang gisulti,” sumala ni Bullecer.

Nanghinaot ang country director sa HLI nga na “misquote” lang ang kongresista ug kini pabiling mibarog sa gisaad niini ngadto sa Cardinal.

Laing kongresista sa Sugbo nga mipaluyo sa Reproductive Health Bill mao ang representante sa ika-inom nga distrito nga si Nerissa Soon-Ruiz.

Matud ni Bullecer nga ila na lang gisalig si Ruiz ngadto sa Labaw’ng Makagagahum tungod sa iyang pagtuo nga kini lisod nang mobakwi sa iyang suporta.

“I don’t say hopeless kay wa may imposible sa Ginoo pero humanly speaking, mura og dili na gyud madala, Ginoo na lay bahala niya,” dugang pamahayag ni Bullecer.

Nasayran nga nagkadaghan karon ang mga kongresista sa nasud nga mipadayag og pagsuporta sa nahisgutang balaudnon.

Ang Reproductive Health Bill kusganong gisupak sa mga pro-life group tungod kay kini giingong nasukwahi sa pagtulun-an sa simbahan.

Kini tungod usab kay gitugot sa nahisgutang proposed measure ang paggamit og mga contraceptives sama sa condom, pills ug uban pa. – BANAT NEWS