Pawnshop modawat kinawat di i-renew

CEBU, Philippines - Isugyot  ni Konsehal Arsenio Pacaña ngadto sa City Treasurer’s Office nga tun-an ang posibilidad sa dili na pag-renew sa mga business permit sa nagkadaiyang mga pawnshop sa siyudad nga gihimong labayanan sa mga kinawat.

Ang lakang sa konsehal maoy usa sa iyang nakita nga solusyon pagminos sa mga kaso sa pagpangawat, pagpanglabni ug pagpanulis dinhi sa dakbayan.

Nagtuo si Pacaña nga dunay kaisog ang mga tulisan ug mga isnatser paghimo og krimen tungod kay dunay tumuranan sa ilang makuha nga butang.

Una nang giawhag sa konseho sa siyudad ang Bangko Sentral ng Pipilinas nga mosusi usab sa mga pawnshop ug mopatuman og mga regulasyon niini.

Buot sa City Council nga dili na modawat ang mga pawnshop og kadudahang mga butang gikan sa mga badlongon sa katilingban.

Apan samtang wala pa mohatag og tubag ang Bangko Sentral sa awhag sa konseho gusto ni Pacaña nga kini tan-awon usab sa City Treasurer’s Office.

“Kaning business permit sa mga pawnshop matan-aw sab kung ma-renew ba kung kadudahan nga gihimong labayanan sa mga kinawat,” sumala ni Pacaña.

Giangkon hinuon sa konsehal nga lisod himuon ang iyang sugyot kun walay pag-abag ug dili magpakabana ang katawhan.

“Mag-agad man pud na kung dunay report ba, kinahanglan nga vigilant pud ang mga tawo nga mutaho kung dunay kasayuran,” dugang pamahayag ni Pacaña.

Ang sugyot sa konsehal iyang giluwatan tungod sa nagpadayong mga panghitabo sa siyudad labot sa pagpangawat, pagpanglabni ug pagpanulis.

Gani ang kapolisan sa dakbayan mitukod na og Task Force nga maoy motan-aw sa mga dapit sa downtown area nga sagad mahitabo ang maong mga gagmay’ng krimen.

 Partikular na diha sa dalan Colon nga una nang giila sa kapolisan nga usa sa mga crime-prone areas dinhi sa tunga-tungang Kabisay-an. – BANAT NEWS