'Agosto 1, may kahulugan'

CEBU, Philippines - Lakip usab sa nasubo ug nagbangutan sa kamatayon sa kanhi presidente mao ang kinatibuk-ang simbahan ubos sa Artsidiyosesis sa Sugbu.Ang chairman sa Commission on Worship nga si Monsinyor Cris Garcia mihulagway nga makahuluganon ang petsa sa kamatayon ni Cory tungod kay natumong kini sa buwan sa Agosto.

“Naa tay kaguol pero nisurender man siya sa Ginoo, naa pud tay kahupay kay namatay siya sa first Saturday ilabi na sa buwan sa Agosto nga mao poy buwan sa pagsaka ni Maria sa langit,” sumala ni Monsinyor Garcia.

Taliwa niini miingon ang Monsinyor nga mag-ampo gihapon ang kinatibuk-ang simbahan alang sa kapahuwayang dayon sa kalag sa kanhi presidente. 

Estrikto apan maluluy-on

CEBU, Philippines - Usa sa nasubo mao si Kongresista Antonio Cuenco ug ang iyang pamilya nga mihulagway kang Cory nga usa ka sinserong pangulo sa Pilipinas.

Gipadayag ni Cuenco nga nagkauban sila ni Cory niadto pang tuig 1965 dihang ang bana niining si Ninoy nahimong senador ug siya napiling kongresista.

    “Limpyo kaayo ang iyang binuhatan, way malisya, estrikto apan maluloy-on, dunay kasing-kasing nga dili modumot sa iyang mga kaatbang,” sumala ni Cuenco.  

Simbolo sa kagawasan

 Sa iyang bahin, gihulagway usab ni Konsehal Joey Daluz ang kanhi presidente nga simbolo sa kagawasan sa nasod ilabi na sa kalisod ug panaugdaug.

Ang konsehal nga mouban kaniadto sa halos tanang lakaw sa iyang inahan nga si Inday Nita nga suod nga higala ni Cory miingon nga ang kanhi presidente usa ka historical leader.

“Ang purpose sa iyang pagka-presidente natuman gyud kay she had freed the Filipino people at her time against tyranny and dictatorship,” matud pa ni Daluz.

Buhatan og pelikula

Ang mga opisyal sa dakbayan sa Lapulapu nagbangutan usab sa kamatayon ni Aquino, si Lapulapu City Vice Mayor Mario Amores mibutyag sa Banat News nga usa ka isog nga babaye si Cory sa dihang siya misakbang sa piniliay sa diktador nga si Presidente Ferdinand Marcos ug maoy nagbukas pagbalik sa demokrasya sa nasud.

 "She will go down in history as the person who was brave and smart. She fought and toppled a dictatorship, not an easy feat," matud pang Amores ug midugang nga angayang buhatan og pelikula ang kinabuhi niini. (Elly Bolonos, uban sa report nila ni Romeo Limpangog ug Bong Soriano)   (BANAT NEWS)