Migamit og compressor nalumos

CEBU, Philippines - Milutaw nga wala nay kinabuhi ang usa ka mangingisdang diver nga mogamit og compressor pagpamana sa lawod tunga-tunga sa Sugbu ug San Carlos City, Negros Occidental kagahapon sa alas 2:00 sa kaadlawon.

Ang namatay nga mangisda giila sa kapulisan nga si Joseph Abaquita, 47, dunay walo pa ka mga gagmay’ng bata nga gibilin sa iyang asawa ug taga sitio Katungan barangay Pondol lungsod sa Balamban.

Si PO2 Cesar Climaco sa kapulisan sa lungsod sa Balamban nga gikahinabi sa Banat News nagkanayon nga mga alas 5:00 na kagahapon sa buntag naabot ang patay’ng lawas sa biktima nga gidala sa mga kaubang divers.

Gikatahong gibikugan ang biktima diha sa ilawom base sa pamahayag sa iyang kaubang si Jovani Dacumos.

Sumala pa ni Dacumos, siya ug usa pa ka diver maoy nagbantay sa hose sa makina sa compressor nga maoy ga-supply og hangin ngadto sa ilang duha ka kauban nga namana sa ilawom, usa na niini ang biktima.

Apan nakurat nalang sila nga kalit lang nilutaw si Abaquita ug nikapyot sa katig sa ilang pump boat ug wala na makatingog bisan gi-unsa nila sa pagsampit hinungdan nga ila nalang kining gi-aswat ug gipasakay sa pump boat.

Gikatahong gitabang pa nila ang biktima apan wala na gyud kini panimuot hinungdan nga nakahukom silang dalhon kini sa Balamban aron madapatan og tambal apan namatay na kini ug milagom ang lawas.

Atol sa paghiling sa mga doktor sa Balamban nasutang walay foul play sa kamatayon sa biktima samtang ang asawa usab niini kumbinsido nga nalumos gyud ang iyang bana human gibikugan.

Samtang matud pa ni PO2 Climaco nga ang agalon sa biktima nga si Elorde Jayme mipasalig nga maoy mogasto sa pagpahiluna sa patay’ng lawas sa biktima.

Dugang pa niini nga daghan nang nahitabo niini diha sa Balamban nga ang mga divers sa panagat nga compressor ang mamatay sa lumos. (Guam Logroño)    (BANAT NEWS)