22-anyos gi-gang rape sa Talisay

CEBU, Philippines - Usa ka babaye 22-anyos nga babaye ang giingong gi-gang rape sa tulo ka mga lalaki mireklamo ngadto sa kapolisan sa siyudad niadtong Biyernes sa hapon sa barangay Biasong, Talisay.

Ang dalaga nga taga dakbayan sa Mandaue gikatahong hubog niadtong tungura dihang nahitabo ang pagpanglugos apan mitumbok sa mga suspek nga sila si Mario Sylverio, Roy Tolomia ug Elgie Quirante pulos residente sa nahisgutang barangay.

Ang tulo gidakop nila ni PO3 Mikie Espina, PO3 Ferdinand Pablo ug PO1 Marciano Parayday ug nagtingkagol karon sa Talisay City detention cell samtang gipaabot pang pasakaan og pormal nga kiha.

Base sa imbestigasyon sa mga polis nga ang biktima uban sa laing duha niya ka higala nga nag-inom diha sa usa ka beach resort sa lugar nianang adlawa.

Human sila mag-inom gikatahong nabuwag ang dalaga sa iyang mga higala ug giingong gipugos og dala sa mga suspetsado ngadto sa ngitngit nga bahin sa nahisgutang lugar ug gitabangan og lugos.

Ang mga suspek daling miikyas human sa hitabo samtang ang dalaga igo nalang midangop ngadto sa presinto pagsumbong, apan sa gihimong follow-up nadakpan ra gihapon ang mga suspek.

Sa laing bahin, usa ka 17-anyos nga babaye ang miduso og reklamo niadtong Biyernes diha sa Talisay City Women and Children’s Protection Desk batok sa iyang half-brother tungod sa giingong paglugos niini kaniya sukad pa niadtong 12-anyos pa siya dihang didto pa sila nanimuyo sa Manila.

Ang maong menor mibutyag ngadto kang SPO1 Margienette Yosores sa Women and Children’s Protection Desk sa Talisay City Police Station kabahin sa gibuhat sa suspek ngadto kaniya.

Ang suspek kinsa 28-anyos (ngan gitago aron di mailhan ang biktima) na karon usa ka minyo gikatahong miabuso kaniya hangtud niadtong Agosto 10, 2008 dihang namalhin na sila og puyo sa barangay Inayawan, dakbayan sa Sugbo.

Sumala pa niini matag abusohon siya niini hulgaon siyang patyon kung mosumbong, dunay higayon niadtong bulan sa Disyembre nga wala niya pakigkitai ang suspek tungod kay nagtuo siyang lugoson siya niini apan gikulata siya niini hinungdan nga misumbong siya kaniadto sa barangay hall sa Inayawan.

Tungod niadto mibalhin siya og puyo sa barangay Tapul sa Talisay apan giapas siya niini kay pabantayon sa iyang anak ug misaad nga di na siya lugoson niini, apan dihang siya mikuyog gidiretso siya niini og dala sa usa ka motel, gikatahong milighot ang biktima apan gidala hinuon siya niini sa usa ka awaaw nga dapit sa Tapul ug didto gilugos.

Tungod sa padayong paghimo niini kaniya ug sa kabalakang usban siya pag-abuso nakadesider siyang mosumbong sa kapolisan.    (BANAT NEWS)