CEBU, Philippines - Dili modupa si Konsehal Christopher Alix sa mga medical personnel sa Cebu City Medical Center (CCMC) nga nasayop pag-diagnose sa usa ka 12-anyos nga batang babaye taga barangay Mambaling pipila ka buwan na ang nakalabay tungod kay nasakit gyud diay kini og dengue.
Gikatahong dihang kini unang gidala sa CCMC tungod kay gihilantan gipapauli ra usab kini sa doktor tungod kay giingong duna lay acute tonsillitis.
Gibalik pagdala ang biktima sa nahisgutang tambalanan tungod sa walay hunong nga hilanat ug didto na nahibaw-an nga kini gi-dengue, butang nga dili mapasaylo ni Mayor Tomas Osmeña kung mapamatud-an nga nagpabaya ang mga mananambal sa ilang katungdanan.
Ang mayor nga kaniadto pa naglungot-lungot sa mga kawani sa CCMC mipadayag nga siya dili gusto nga magdugay pa ang hingtungdang doktor.
Matud pa ni Alix nga walay laing kapaingnan ang mananambal nga mihatag og sayop nga diagnosis sa bata kun dili ang pagkataktak sa serbisyo.
“Ang end result ana is, tangtangon gyud na siya sa trabaho kung mapamatud-an nga nagpabaya sa iyang katungdanan,” sumala ni Alix.
Nasayran nga ang bata wala ipa- blood test bisan kun kini libreng gitanyag sa nahisgutang tambalanan ngadto sa mga pasyenteng gipanghilantan.
Gipaimbestigahan na ni Osmeña sa in-house Ombudsman ang kaso sa bata pagtino kun duna bay nahimo nga pagpabaya ang doktor niini.
Nasayran nga laing doktor usab sa CCMC gusto nga ipatangtang sa mayor tungod sa giingong pagsinggit niini ngadto sa inahan sa usa ka pasyente.
Ang Employee-Management Committee on Investigation sa City Hall miimponer lang og napulo ka adlaw nga pagkasuspenso sa hingtungdan. – BANAT NEWS