Mag-uuma nagdinunggabay

CEBU, Philippines - Pulos nalandig sa tambalanan ang duha ka mag-uuma nga nag-unay og dinunggabay atol sa ilang panaglalis sa bukirang bahin sa barangay Kaliunangan sa lungsod sa Dalaguete niadtong Miyerkules sa alas 11:00 sa gabii.

Ang biktima mao si Cerilo Ambrad, 33, molupyo sa maong lugar samtang ang suspek mao si Antonio Ybarola, usa usab ka mag-uuma ug nagpuyo gihapon sa maong lugar.

Matud pa ni PO2 Reynaldo Amarilinto sa Dalaguete Police dihang nahinabi sa Banat News ang biktima ingon man ang suspek pulos nalandig sa Julio Cardinal Rosales Hospital sa lungsod apan tungod sa seryusong kahimtang gibalhin kini sa tambalanan dinhi sa dakbayan sa Sugbo.

Si Ambrad samdan sa walang bahin sa iyang dughan human gidunggab sa suspek, samtang ang naulahi nakaangkon usab og daghang samad dinunggaban sa iyang tiyan ug ubang bahin sa kalawasan.

Subay sa inisyal nga pakisusi ang biktima ug suspek nagkalalis nga niresulta sa ilang pag-initay ug nagka-away nga niresulta sa ilang pagdinunggabay. Ang kapulisan padayun pa sa ilang imbestigasyon pagtumbok kun si kinsa ang sad-an sa maong panghitabo. - Darrel Carumba (BANAT NEWS)