Titulo sa Balili sayop - Bokal Maambong

CEBU, Philippines - Niangkon ang usa sa mga opisyales sa Department of Environment and Natural Resources kon DENR-7 nga sayop ang land title nga nahatag ngadto sa tag-iya sa Balili Beach Resort sa lungsod sa Naga nga napalit sa kagamhanan sa lalawigan sa Sugbu sa kantidad nga P100 milyones niadtong miaging tuig.

Kini maoy gipahibawo ni Provincial Board member Victor Maambong kabahin sa nagpadayong pakisusi sa titulo sa maong lote nga giingong 40 porsiyentog nasanapan na og tubig sa dagat.

Sumala pa ni Maambong nga usa sa iyang office staff ang iyang gisugo ngadto sa DENR aron sa paghangyo sa mga opisyales niini nga mohatag sa mga sakop sa Hunta Probinsiya og katin-awan kun ang 40 porsiyento sa lote sa Balili beach hunasan ba ug na-reverted ba kini pabor sa gobiyerno.

Matud pa ni Maambong nga ang iyang staff gisultihan sa usa sa mga opisyales sa DENR nga dili gustong magpahingalan nga makatabang sila sa pakisusi sa provincial board. Ang maong staff nipagawas og unofficial nga findings nga ang ilang buhatan nasayop sa paghimo sa titulo sa Balili diha sa lungsod sa Naga.

Si Maambong mitug-an hinuon nga ang maong opisyales mohatag lamang unya sa tinuoray nga titulo sa yuta nga gipanag-iya sa usa ka enhinyero karong mosunod nga adlaw.

Dugang pa ni Maambong nga ang mao unya nga impormasyon sa DENR posibleng maoy basehanan sa kagamhanan sa lalawigan sa Sugbu sa pagbawi sa bayad sa Kapitolyo sa pagpalit sa maong lote.

Samtang si Board member Juan Bolo uyon nga bawion nalang ang nabayad sa Kapitolyo kun may mapamatud-ang depektoso ang titulo kay nalakip na man kini sa warranty sa tag-iya sa luna nga clean ug valid ang maong titulo base sa gipirmahang Memorandum of Agreement kon MOA sa Kapitolyo ug sa mga Balili.

Apan subli niyang gipanghimakak nga naka-commission siya sa pagkahalin sa maong lote tungod kay dili siya ang ahente niini kundili mao si anhing Lumen Durano ang asawa ni kanhi City Prosecutor Loreto Durano. -  BANAT NEWS