Marijuana planter nadakpan

CEBU, Philippines - Usa ka mag-uuma ang nadakpan atol sa pagpangronda sa kapulisan sa usa ka dakung plantasyon sa Marijuana sa bukirang bahin sa sitio Basang Pangpang barangay Candiis sa lungsod sa Badian niadtong Martes sa alas 12:30 sa udto.

Dili muminos 1,175 ka mga fully-grown Marijuana ang nalarot sa kapulisan wala pay labot sa mga bag-o pang gipangtanum nga moabot og 350 ka punoan.

Nadakpan sab si Casiano Cabungcag, 56, nagpuyo sa maong lugar ug maoy gituohang nananom sa maong gidiling tanom.

Matud ni PO3 Emmanuel Caballero sa Badian Police dihang nahinabi sa Banat News may mihatag kanila og impormasyon pinaagi sa tawag sa telepono nga nagpahibawo kabahin sa maong plantasyon.

Ang hepe sa maong police station nga si Insp. Raymundo Rodriquez milusad dayon og operasyon sa maong dapit ug diha nalang nila nadiskubrehang gisagol diay kini og tanom sa mga mais ug sibuyas. (DC). - BANAT NEWS