Priso naghikog sa karsel

CEBU, Philippines - Ang nagpakamatay giilang si Reynaldo Jurac, usa ka mananagat nga taga barangay Pugalo sa nahisgutang lungsud kinsa nakit-an sa iyang kaubang piniriso alas 5:30 sa kaadlawon kagahapon nga nagbitay sulod sa pansayan sa detention cell nga naghikot sa iyang liog ginamit ang liston sa iyang jacket nga ang kaputol gihigot ngadto sa grill.

Si PO2 Melvin Collados, desk officer sa Alcoy Police Station nga gikahinabi sa Banat News nagkanayon nga si Arnold Adlawan maoy nakakita sa patayng lawas.

Sumala pa ni PO2 Collados, nga sa wa pa magpakamatay si Jurac nagbilin pa kini mensahi pinaagi sa pagsuwat diha sa iyang lawas sa walang bukton nga “way pasayloay” sa walang palad nga “way pasayloay” ingon man sa tiyan niini nga “way pasayloay” ginamit ang usa ka pentel pen.

Ang pansayan gikatahong layo sa detention cell ug nag-uwan-uwan usab niadtong milabay’ng adlaw maong wala nila mabantayi ang paghikog.

Sa sayo pa gikatahong nanghuwam og pentel pen si Jurac kay maghimo kini og damahan nga ilang kalingawan.

Si Jurac napriso usa palang ka semana tungod sa kasong grave threats sa iyang maguwang nga si Gregorio diha sa sala sa Municipal Circuit Trial Court (MCTC) sa lungsod sa Boljoon.

Matud pa niini nga ang nagpakamatay gikatahong makadaghan nang gi-alarma sa kapulisan sa lungsud sa Boljoon human kanunay nga manghasi sa panahon nga mahubog ug manghagis sa ilang pinuy-anan. – BANAT NEWS