Gipusposan giluba naangol

CEBU, Philippines - Nabulit sa bun-og ug mga samad sa bala ang usa ka tawo kinsa gipusposan og tubo ug giluba pa gyud didto sa Mango Avenue, ning dakbayan sa Sugbo kagahapon sa ala 1:30 sa kaadlawon.

Ang biktima mao si Teodor Villagomez Sattarin Jr. taga barangay Mabolo ning dakbayan sa Sugbo, samtang ang mga suspetsado mao sila si Kerby Sarmenta de la Rama, 23, taga Opao Mandaue, Ian Evangelista, 26, taga 344 Alang-alang Mandaue City, ug Jessie de la Rama Yaon, 23, taga Bogo City.

Matud pa sa kapolisan nga naglakaw sa karsada ang biktima kauban sa iyang mga barkada dihang paglabay nila sa maong lugar, kalit lang kining gihapsan og tubo.

Apan wala pa matagbaw ang mga suspek dihang naligid sa yuta ang biktima, gitusaktusak pa sa kutsilyo ang lawas niini .

Maayo nalang kay maayo mokarate ang mga kauban sa biktima unya maoy nakigharong sa mga suspetsado ug dihang naabtan sa kapolisan giposasan dayon ang tanan.

Gihatod dayon sa tambalanan ang biktima samtang ang mga suspek nagpahayahay na sa prisohan sa kapolisan sa Fuente Osmeña ning dakbayan sa Sugbo ug nagpaabot sa tukmang kaso nga isang-at batok kanila. - Johar Lapasaran (BANAT NEWS)