Armado misukol sa polis

CEBU, Philippines - Giposasan dayon ang usa ka armadong tawo kinsa misukol sa kapolisan didto sa merkado publiko sa Sitio Tacan, Brgy. Babag dakbayan sa Lapulapu kagahapon sa buntag.

 Ang nagpahayahay karon sa prisohan sa kapolisan sa dakbayan sa Lapulapu mao si Junard Soson, 24, ulitawo , kinsa lumad nga taga Kapatagan, Lanao del Norte apan kasamtangang nagpuyo sa Brgy. Pajac, dakbayan sa Lapulapu.

 Si SPO1 Rogelio Trinidad sa mobile patrol sa kapolisan sa Lapulapu mibutyag sa Banat News nga nagresponde sila sa alarma kalabot sa maong suspetsado nga matud pa nagsuroysuroy sa merkado nga nagtangkil sa iyang Ingram nga daghan kaayo og bala hinungdan nga puwerting kuyawa sa katawhan sa maong lugar.

 Apan sa paghiabot nila sa maong lugar, matud pa ni SPO1 Trinidad nga gisugat sila’g mga bala sa Ingram sa suspetsado apan gumikan kay walay praktis, wala kini makaigo kanila.

 Apan imbis bawsan og mga bala, gihiktan hinuon kini og posas human kini nila layoga ug giilogan sa Ingram, ug gipaslak dayon ngadto sa prisohan samtang magpaabot sa tukmang kiha nga isang-at batok kaniya. - Bong Soriano (BANAT NEWS)