CEBU, Philippines - Arestado ang 16 ka sakop sa Alpha Kappa Rho fraternity human maaktuhing nagpahigayon og initiation pinaagi sa hazing sulod sa usa ka abandonadong panimalay sa Colveta Dos sa barangay Basak-San Nicolas sa miaging adlaw.
Ang mga batan-on nailhan nga sila Edilberto Escalran, 19; Ronan Servantes, 18; Plain Bausan, 21; Carl Reyes,28; Edileo Donaire,22; Abraham Dumdum,20; Clifford Padica,24; John Christian Reyes,23; John Prince Bagundol,18 ug Gleen Christian Tecson ,18, samtang unom niini mga menor de edad nga nagpangidaron og 16 hangtod 17 nga mga gituohang mga estudyante sa usa ka unibersidad dinhi sa dakbayan.
Si SPO2 Vestillo Dabatos sa Mambaling Police Station nagkanayon nga ang mga tanod sa nahisgutang lugar nakadawat og taho sa usa ka concerned citizen kabahin sa hazing nga nahitabo sa nahisgutang lugar.
Ang mga tanod daling misusi sa lugar ug tuod man ilang naaktuhan ang mga batan-on nga nagbanos-banos og puspos sa gituohang mga recruits (mga minors) nga usa ka kalapasan Anti-Hazing Law.
Nakuha gikan sa grupo ang paddle nga may pangalang “Akrho” nga maoy gigamit sa hazing, 20 ka disposable syringes, 16 ka empty ampules sa Nubain.
Matud pa ni Dabatos nga ang pulo ka mga batan-on gipasakaan na og kaso kagahapon samtang ang unom ka mga menor de edad gibutang sa holding cell alang sa mga batan-on sa Cebu City Police Office. – BANAT NEWS