Abyon gipabalik kay may "Bomba"

CEBU, Philippines - Usa ka international flight gikan dinhi sa Sugbu padulong sa nasud sa Singapore nga may sakay nga 127 ka pasahero ug tripulante ang wala makapadayon sa paglupad human makadawat og hulgang kini pabuthon sa nagpailang sakop sa Jemaah Islamiyah kagahapon sa hapon.

Ang Silk Air flight MI-541 padulong na untang molupad human sa pre-flight sequence ala 1:45 sa hapon dihang kalit kining gi-radyuhan sa control tower nga di padayunon sa pagpalupad gumikan kay may hulgang kini bombahan.

Si Mactan-Cebu International Airport General Manager Ret. General Danilo Francia mao mismoy nakadawat sa text message sa bomb threat gikan sa nagpailang sakop sa JI.

Si Francia mibutyag nga kasamtangang naa siya tunga-tunga sa panagtigom sulod sa usa ka conference room sa usa ka dakong department store sa North Reclamation Area sa dakbayan sa Sugbu dihang nakadawat sa maong text message.

“Mga kapatid Allahu Akbar ipagdasal natin ang kaluluwa nang kapatid natin namatay sa pagsabog ng Silk Air minuto ngayon patungong Singapore Allahu Akbar. JI” sumala pa sa maong text nga nadawat ala 1:17 sa hapon kagahapon.

Ang JI usa ka international terrorist group nga nagbase sa nasud sa Indonesia ug gihulagway sa militar nga duna nay koneksyon sa lokal nga teroristang Abu Sayyaf sa Mindanao maoy gitumbok nga utok sa Bali Bombings sa Indonesia nga mikalas og 200 ka tawo ug miangol og gatusang mga turista gikan sa Australia ug Uropa ingon man Amerika.

Gumikan niini, daling gitawgan ni Francia ang MCIA sa pagsusi sa mga flights nga mobiya kagahapon sa hapon ug nakumpirmar nga dunay international flight nga Silk Air padulong sa Singapore ang gikatakdang mobiya.

Daling gialerto ang mga sakop sa 7th Police Center for Aviation Security (PCAS-7) pinangulohan ni Supt. Joselito Salido ug gilibutan ang maong abyon uban sa mga emergency personnel sa MCIA.

Ang mga pasahero hinay-hinay nga gipakanaog sa maong abyon ug gisakay sa shuttle buses balik sa terminal area ug human niini gidala ang maong abyon sa seclusion area ug gisugdan sa pagsiksik gamit ang mga bomb sniffing dogs.

Ang mga pasahero ug bagahe gitagsa-tagsa usab sa pagsusi ginamit ang metal detectors ug K9 Unit pagsigurong walay bomba sulod sa dul-an tulo ka oras ang pagsiksik sa mga operatiba lakip na ang sulod ug gawas sa maong abyon.

Nianang pagka-alas 4:15 gideklarar nga negatibo ang maong hulga ug walay kamatuorang dunay bombang gitanom sa maong abyon.

 Ang mga pasaherong nalangay sa biyahe gipakaon sa airline company samtang nagpaabot sa pagbiya nila padulong sa Singapore.

Si Ajizh Morris, ang station manager sa Silk Air human sa koordinasyon sa PCAS mitugot nga paluparon na og balik ang mga pasahero sa maong abyon alas 5:45 kagahapon sa hapon.

Si Gen. Francia mipasabot nga ilang seryosuhon ang mga susamang hulga matinuod man o dili gumikan kay kinabuhi sa mga pasahero ug propreyidad ang naa sa peligro.

Ang kadagkuan sa PCAS gipaabot nga makig-alayon sa ubang ahensya sa law enforcement unit sa gobiyerno pagsubay kung si kinsa ang maong tawong mipadala sa maong text message.

Sa pagkakaron wala pay ideya ang PCAS kun unsay motibo sa maong tawo pagpadala sa susamang text message. – BANAT NEWS