Gibunalan, gipusil angol

CEBU, Philippines - Naangol ang usa ka ulitawo human kini bunali unya gipusil sa wala hiilhing kriminal samtang natulog siya sulod sa iyang payag didto sa Tabok, Amalig Bato, siyudad sa Danao niadtong miaging gabii.

Ang biktima mao si Ian Pelenio, 20, ulitawo, nga taga barangay Santikan sa maong dakbayan.

Si SPO4 Teofilo Deguilmo sa Danao City Police Station mibutyag sa  Banat News nga nag-inusara nga natulog ang biktima sa iyang payag dihang kalit lang gisaka sa kriminal unya gipusposa’g kahoy ang ulo niini apan dihang nakabangon kini ug buot untang mosukol gipusil ug nasabak ang tuo niyang paa.

Gihatod dayon sa mga silingan ang biktima ngadto sa tambalanan sa dakbayan sa Sugbu samtang gipangita pa sa kapolisan ang kriminal. - Darrel a. Carumba (BANAT NEWS)