CEBU, Philippines - Namatay ang usa ka drayber sa habal-habal human kini pusila sa wala hiilhing lalaki didto sa barangay Canduman, dakbayan sa Mandaue sa miaging gabii.
Ang biktima mao si Judy Catarungan, 22, ulitawo, nga taga barangay Casili, sa maong dakbayan.
Si Inspector Gregorio “George” Anino, hepe sa homicide section sa Mandaue City Police Office (MCPO) miingon nga nagpadagan sa iyang motorsiklo ang biktima dihang pag-abot niini sa barangay Canduman gipara kini sa wala hiilhing lalaki apan sa iyang paghunong kalit siyang gipusil sa ulo nga maoy hinungdan sa hinanaling kamatayon niini.
Padayon pang gisusi sa kapolisan ang maong hitabo. - Romeo T. Limpangog (BANAT NEWS)