Marijuana iya sa drug lord

CEBU, Philippines - Gikonpirmar ni Dangerous Drug Board (DDB) Undersecretary Atty. Clarence Paul Oaminal nga ang mga drug lord dinhi sa dakbayan sa Sugbu maoy financier sa mga plantasyon sa marijuana sa bukirang barangay ning lalawigan.

Matud pa ni Oaminal nga nakahipos sila og mga report nga ang maong mga drug lord maoy nag-supply og mga abuno og mga liso ug lubangon nga marijuana ngadto sa mga mag-uuma.

Gumikan niini nakig-alayon karon ang DDB ngadto sa kapulisan sa dakbayan ug lalawigan sa Sugbu ug sa mga lokal nga opisyal sa gobyerno aron tabangan nila og sulbad kining problemaha.

Sa samang higayon giawhag ni Oaminal ang mga mag-uuma nga dili magpailad sa mga drug lord kay sila maoy mahimong makaluluoy kun hidakpan kay dili sila pasayluon sa balaod.

Matud pa ni Oaminal nga ang pait kaayo kun mapriso sila unya magbisyo pa ang ilang asawa, ang kuwarta nga mahipos nila gikan sa marijuana walay kapuslanan.

Si Oaminal nangayo na og listahan sa mga mag-uuma nga nananom og marijuana aron ipasikop kini sa kapulisan.   (BANAT NEWS)