Motor vs. motor 1 patay

CEBU, Philippines - Usa ang patay ug laing usa angol sa duha ka mga drayber sa motorsiklo nga gituohang pulos mga hubog ug nagkabinanggaay taliwala sa karsada sa sitio Abo barangay Poblacion sa lungsod sa Sogod niadtong Domingo sa alas 2:00 sa kaadlawon.

Ang namatay pag-abot sa tambalanan mao ang drayber sa motorsiklong kolor itom nga si Rexil Sodaria, 31, taga sitio Luyaw barangay Pansoy sa maong lungsod ug angol sab ang drayber sa gikabangga niining motorsiklo nga si Eugeniano Armenton, 28, taga sitio Makina barangay Logo sa lungsod sa Borbon.

Matud pa ni PO3 Elimar Mendoza sa Sogod Police dihang nahinabi sa Banat News ang duha ka mga motorsiklo naggikan sa managlahing lugar ug pag-abot sa nahisgutang lugar nagkadinasmagay tungod kay parehong kusog ang dagan ug ngitngit ang lugar.

Subay sa nahipos nga impormasyon sa kapulisan pulos nalabay ang mga biktima ug nakaangkon og mga kadaut sa lawas tungod kay pulos usab wala magsul-ob og helmet.

Ang duha daling gitabang sa mga molupyo sa maong lugar ug gihatud sa Juan Dosado Memorial Hospital sa maong lungsod apan si Sodaria gideklarar nga dead on arrival tungod sa head injury samtang mga ginagmay nga pangos ug bun-og ang naangkon ni Armenton. Hinuon ang kabanay ni Sodaria dili na interesado pa nga   mosang-at og kaso human kini nagkasabot sa kabanay usab ni Armenton nga maoy moabaga sa tanang gastuhan pagpalubong sa patay'ng lawas.   (Darrel Carumba)  (BANAT NEWS)