Dinagat Festival saulogon sa Cordova

CEBU, Philippines - Ang kagamhanan sa lungsod sa Cordova migahin og P2.1 milyones alang sa ika-10 niining kasaulogan sa Dinagat Festival karong umaabot nga Agosto 9,2009.

Kini ang gibutyag ni Mayor Adelino Sitoy sa Cordova kinsa mipasabot nga ang Dinagat Festival maoy giilis sa Bakasi Festival.

Matud pa ni Sitoy nga ang Bakasi Festival maoy nakapakusog sa mga produktong bakasi sa maong lungsod ug karong misikat na ang maong matang sa pagkaon sa dagat, gisagop na usab nila ang Dinagat Festival aron ikapaila na usab ang ubang mga produkto sa kadagatan sa maong lungsod ilabi na ngadto sa mga turista.

Midugang si Sitoy nga pipila sa maong mga produkto nga ilang i-promote pinaagi sa Dinagat Festival naglakip sa tihi-tihi, danggit, kitong ug uban pang mga makaon sa kadagatan nga anaa makita sa ilang lugar.

Ang Dinagat Festival sa Cordova maoy gihulagway nga labing unang festival sa tibuok probinsya hinungdan nga himoon nilang bongga ang selebrasyon niini karong tuiga.

Gani ang kagamhanan sa probinsya sa Sugbo miamot og P300 mil alang sa maong kalihokan.

Dako og pagsalig ang mayor nga labing mosulbong ang turismo sa ilang lungsod pinaagi niining Dinagat Festival karon. – BANAT NEWS