Mike motambong sa SONA karon

CEBU, Philippines - Motambong si Bise Mayor Michael Rama sa ipalanug nga State of the Nation Address (SONA) ni Presidente Gloria Macapagal Arroyo karong adlawa.

Kini isip presidente usab sa Vice Mayors’ League of the Philippines (VMLP) ug maoy morepresintar sa nahisgutang kapunungan.

Gipaabot ni Rama nga ang presidente mopahibalo sa publiko labot sa mga accomplishment niini sa pagpangatungdanan.

Samtang gipanalipdan usab sa bise mayor si Arroyo gikan sa mga pagsaway nga pulos lang gihapon bakak ang mga ipanulti niini atol sa iyang SONA.

“Kun bakak pa nganong daghan man gihapong mga project nga makita, kana diay'ng gidala sa mga congressman, kun gibabagan pa na sa presidente dili na kalusot,” matud ni Rama.

Gani miingon ang bise mayor nga ang dakbayan maoy dako og nakuha nga mga mihoras gikan sa nasudnong kagamhanan.

Pipila sa ginganlan ni Rama mao ang katukuran ug paghuman sa bag-ong Cebu City Jail ingon man sa Plaza Sugbu ug daghan pa.

Gipadayag hinuon sa bise mayor nga dili usab mapugngan ang mga lihok-protesta niadtong mga grupo nga wala makauyon sa pamunoan niini.

Partikular na niadtong mga militanteng pundok nga taud-taud nang misaway ug nanawagan kang   Arroyo nga mokanaug na sa pwesto.

Bugtong panghinaot ni Rama nga malinawong mapahigayon ang mga kalihukan niining adlawa lukop nasud nga naglakip dinhi sa Sugbu.

“Di man ta kapugong anang concerted activities, wa may SONA nga akong nahinumduman nga way mga protest but it will not end up unta anang shocking stories ba,” dugang ni Rama.

Ang ipalanog nga SONA ni Arroyo karong adlawa mao na ang iyang ika-siyam ug maoy katapusang higayon sulod sa iyang termino pagka-presidente sa nasud. – BANAT NEWS