Lawaan I ngit-ngit kaayo

CEBU, Philippines - Ang mga molupyo sa barangay Lawaan I, dakbayan sa Talisay gibati og kabalaka nga masubli ang nahitabo kang Padre Jovencio Rabusa tungod kay wala gyu’y suga ang ilang lugar.

Ang maong mga molupyo mibutyag sa Banat News nga kapin na sa usa ka buwan nga wala magsiga ang mga poste sa kuryente sa ilang barangay ug gipasagdan lang kini sa mga opisyal sa ilang lugar.

Gani may mga higayon nga gumikan sa kangitngit usahay magkadinasmagay na ang managsilingang magkasugat sa dalan kay bisan tuslokon pa ang ilang mata dili gyud sila makakita gumikan sa kangitngit.

Apan gawas niini mahulagway lang gihapon nila ang ngilngig kaayong nahitabo kang Padre Rabusa nga sa walay duhaduha mahitabo usab sa dili madugay sa ilang dapit gawas kun dili magmika ang mga oipisyal sa ilang barangay

Ang ila lang karong gikulbaan kun kinsay mahisama kang Padre Rabusa nga gumikan sa ka walay pagtagad sa mga opisyal sa gobyerno mibuhis sa iyang kaugalingong kinabuhi. Si Padre Rabusa didto tulisa ug patya sa south coastal road (SCR) nga habig sa barangay Cansojong sa maong dakbayan.

Hinuon si Konsehal Arturo Bas, tsirman sa komitiba sa kahapsay ug kalinaw sa konseho sa siyudad sa pakighinabi niini sa Banat News nagkanayon nga gianam-anam na og pasiga ang mga suga diha sa poste sa SCR.

Si Talisay City Administrator Richel Bacaltos mipasalig usab nga wala nay angayan ang taga Talisay kay ila nang gitagad kining maong suliran. (Brenda D. Batuto)    (BANAT NEWS)