Tag-iya sa Balili beach pabayron

CEBU, Philippines - Hayan paninglan og balik sa kagamhanan sa lalawigan sa Sugbu ang tag-iya sa 25 ka ektarya nga Balili Beach sa lungsod sa Naga karong nasayran nga ang maong lote iya sa gobyerno.

Kini human ibutyag ni Atty. Benjamin Cabrido Jr., usa ka environmental lawyer nga ila nang nadawat ang dokumento sa 9 ka lote sa Naga nga gipanag-iya ni Engr. Balili, nahibalik na ngadto sa kagamhanan tungod kay gisaopan na kini sa dagat.

Sumala ni Provincial Board member Victor Maambong nga kun mahiuli na ang maong lote ngadto sa gobiyerno, ang Kapitolyo dili na obligado nga mobayad pa niini ngadto sa tag-iya.

Matud pa ni Maambong nga ang pag-angkon ni bokal Juan Bolo nga 40 porsiyento sa napalit nga lote sa probinsiya hunasan, mahimo kining basehanan nila nga paninglan nila si Engr. Balili sa gibayad sa Kapitolyo kaniya.

Nasayran nga gibayran sa kagamhanan sa lalawigan og P100 milyones si Balili ning iyang luna nga gihimong Balili Beach tungod kay wala magdahom ang kagamhanan nga mahimo diay’ng hunasan ang maong lugar.

Giangkon ni Maambong nga gitugotan sa hunta probinsyal pinaagi sa usa ka resolusyon si Gobernador Gwendolyn Garcia nga mopalit sa maong luna sa ngalan sa kagamhanan sa lalawigan tungod sa kabarato niini ug titulado pa.

Apan karong nasayran nga dagat diay ning lunaa, katungod sa kagamhanan ang pagpaningil sa kuwartang gibayad niini ngadto kang Balili.

Hinuon wala pa hisayri ang habig ni Balili kun mouli ba kini sa kuwarta nga gibayad kaniya sa Kapitolyo. (Chester Abadilla)    (BANAT NEWS)