CEBU, Philippines - Mga 24 ka mga insular prisoners gikan sa Cebu City Jail gihatod na ngadto sa New Bilibid Prisons kagahapong adlawa luwan sa Negros Navigation.
Kini mao na ang ikalima nga pagpadala sa City Jail og sentensyadong mga binilanggo ngadto sa Muntinlupa niining tuiga.
Ang mga insular prisoners mao kadtong mga inmates nga nasentensyahan og labing minos unom ka tuig nga pagkabilanggo sa kaso nga ilang giatubang.
Lakip sa mga inmates nga gihatod ngadto sa New Bilibid Prisons nakonbikto sa kasong pagpatay, pagpayuhot og ginadiling drugas ug uban pa.
Matud ni Jail Warden Supt. Efren Nemenio nga ang shipment maoy kabahin sa ilang decongestion program sa bilanggoan.
Nagkanayon si Nemenio nga gitinguha nilang mapadala ngadto sa kauluhan ang tanan nilang insular prisoners tungod kay misaka na usab ang populasyon sa City Jail.
Niadtong miaging buwan, mi-us-os ang gidaghanon sa mga inmates sa nahisgutang bilanggoan tungod usab sa pagbista sa Justice on Wheels.
Apan miingon ang Jail Warden nga sa kasamtangan, miabot na usab og 2,020 ang kinatibuk-ang gidaghanon sa mga piniriso diha sa City Jail. -- Elly Bolonos (BANAT NEWS)