2 ka indian mi-'rape' sa maid

CEBU, Philippines - Duha ka Indian national nagtingkagol sa Talisay City Detention Cell human gipasanginlang mibanos-banos og lugos sa ilang 17-anyos nga babayeng katabang. Gihimo kini sukad pa niining unang semana sa Hulyo diha sa balay sa mga suspek sa Hacienda Milan, barangay Maghaway, dakbayan sa Talisay.

Ang gipriso mao sila si Jaskaran Singh, 27, ug Gurpreet Singh, 24, parehong Indian national ug mga ulitawo nga nagpuyo diha sa nahisgutang lugar. Nasikop sila ni PO3 Ferdinand Pablo, PO2 Leandro Azarcon, PO1 Marciano Parayday ug PO1 Allan Villazurda.

 Ang batang biktima   nagkurog pa kini sa kahadlok sa dihang giimbestigar ni SPO1 Margienette Yosores sa Talisay City Women and Children’s Protection Desk ug magsige og hilak.

Sa dihang nahinabi kini sa Banat News kagahapon sa buntag mipasangil kining gimolestiya siya sa duha niya ka mga among Indian sukad pa sa iyang pagsulod isip katabang niadtong Hulyo 8, 2009 ug dili siya pagawson sa balay.

Ang duha ka Indian nag-negosyo og patanto og kuwarta.

Matud sa bata nga kun manglakaw na ang iyang mga amo, i-lock ang pultahan sa balay aron dili siya makagawas ug gidid-an siya sa pakigsulti ni bisan kinsa.

Nagkanayon ang bata nga nagtuo siya nga dili na siya usban og lugos sa iyang mga amo human siya lugosa sa unang adlaw sa iyang pagsulod isip katabang.

Wala siya mosulti ni bisan kinsa tungod kay nag-apas siya sa sweldo aron iyang mapadala ngadto sa ila sa probinsiya sa Negros nga mapalit og tambal sa iyang amahan nga masakiton.

Matud usab niini nga kun duna siya’y buhaton sa kusina binastosan siya sa mga suspek ug oras nga mosulod siya sa iyang kuwarto aron mopahuway ang duha niya ka amo magpuli-puli og sulod sa kuwarto ug ingnon siyang “sex mate” lang sila ug kun dili siya mosugot lubagon ang iyang mga kamot. Dunay pinaakan sa iyang walang suso ang biktima kinsa usa sa mga suspek ang giingong mipaak niini.

Ang bata midugang nga gitanyagan siya og P1,500 matag buwan nga sweldo sa mga suspek apan tungod sa iyang kahimtang nananghid siya sa duha nga mopauli apan wala siya tugoti ug wala usab siya sweldohi.

Si Marilyn Cabiles, 40-anyos nga residente sa nahisgutang barangay usa ka katabang usab og Indian national maoy mitawag og mga polis aron ma-rescue ang bata gikan sa iyang mga amo.

Si Cabiles sa gipahigayong imbestigasyon ni Yosores nagkanayon nga niadtong Biyernes sa hapon naglakaw siya diha sa Hacienda Venicia diin ang maong subdivision nahimutang usab sa Maghaway paingon nang mopauli sa dihang natungod siya sa balay sa mga suspek gitawag siya sa batang biktima.

Matud niini nga misumbong ngadto kaniya ang bata sa gibuhat nga pag-among-among sa iyang mga amo ngadto kaniya ug buot unta kining molayas apan dili makagawas sa balay tungod kay gi-padlock sa mga amo nga nanglakaw.

Apan sa dihang nagpadulong na ang mga amo sa bata daling mibiya si Cabiles ug mipaingon ngadto sa balay sa ilang higalang polis nga si PO1 Parayday sa Camella Homes, Maghaway ug iyang gisumbong ang sitwasyon sa bata.

Si PO1 Parayday nga nadestino diha sa Talisay City Police Station nangayo og panabang sa iyang mga kaubang polis diin ilang gi-rescue ang biktima ug gisikop ang mga suspek.

Karong Lunes, ang duha ka Indian gikatakdang pasakaan og kasong serious illegal detention ug rape diha sa piskaliya sa siyudad.

Sa laing bahin, ang Banat News  mitawag ngadto sa detention cell ug mihangyo nga makuhaan og pamahayag ang mga suspek.

Apan si PO3 Julius Caesar Parajes, duty jailer nagkanayon nga ang duha namalibad nga motubag sa tawag tungod kay dili kini gustong makuhaan og pamahayag.   (BANAT NEWS)