Ombudsman OK sa Gwen College

CEBU, Philippines - Gitumbok ni Deputy Ombudsman for the Visayas Sergio Apostol nga wala siya'y nakitang kalapasan sa lakang sa kagamhanan sa probinsiya sa Sugbu sa pagtukod og eskuylahan sa lungsod sa Naga nga nganlan og Cebu Gwen College.

 Matud pa ni Apostol nga nakasugat siya og susama nga sumbong didto sa Manila nga may usa usab ka government project nga ginganlan sa ngalan sa politiko nga nagpatukod niini apan wala kini mulampos.

 Gipasabot hinuon ni Apostol nga mahimong makwestyon lamang ang maong pagpatukod sa lalawigan sa Sugbu og Cebu Gwen College kun masayran nga may nagpahiping personal ug politikanhong interest sa maong proyekto.

 Si Apostol mipahibawo usab nga mahimong makaduol sa ilang buhatan ang bisan kinsang mga mamumuhis nga buot mokwestyon sa maong proyekto sa lalawigan aron makahimo usab sila og aksyon.

 Samtang si provincial board member Victor Maambong walay pagtuo sa pamahayag ni bokal Juan Bolo nga sulagma lamang nga Cebu Government World-Class Education Nobelty College (Cebu GWEN College) ang iyang nahunahunaan nga maoy ihingalan sa pagatukorong eskuylahan sa probinsiya.

 Matud pa ni Maambong nga dili na usab kaayo ideal ang pagtukod sa probinsiya og college diha sa lungsod sa Naga tungod kay daghan na mang eskuylahan nga duol sa Naga ug labaw sa tanan dili usab makapahimulos niini ang taga amihanang bahin sa lalawigan. – BANAT NEWS