Vision Theater nasunog

CEBU, Philippines - Gibana-banang mokabat sa P2 milyones ang kantidad sa mga kabtangang gilamoy sa kayo sa pagkasunog sa Vision Theater sa dalan Colon ning dakbayan sa Sugbu kagahapon sa ala 1:12 sa hapon apan walay kinabuhing naangin.

Si SFO1 Alikasim Espenola, imbestigador sa Cebu City Fire Department mibutyag sa dySS Super Radyo ug Banat News nga mga alas 6:40 na kagabii nakasulod ang ilang mga sakop sa maong karaang sinehan ug hangtud sa pagsulat ning balita nagpadayon pa ang ilang pagpawong sa kayo.

Giklaro niya nga didto magsugod sa ground floor sa maong sinehan ang kayo apan wala hisayri ang hingpit nga hinungdan.

Base sa nakuha nilang listahan, adunay 25 ka mga tenante o mangangabang nga nag-ukopar sa maong edipisyo nga kasagarang mga baligya pulos mga DVD, VCD, cellular phone, ug uban pa.

Gibutyag ni Espenola nga ang adlaw’ng Biyernes kasagaran wala kaayo'y tawo ang maong lugar ang mga nanag-abang diha kasagaran mga Muslim ug ang mga lalaki moadto kini sa ilang mosque aron mag-ampo.

Naglisod ang mga sakop sa kambomberohan sa pagpahunong sa maong sunog tungod sa kaapiki sa maong lugar ug kuwang usab sila og mga kahimanan sama sa “breathing apparatus”.

Ang Cebu City Fire Department mipadalag pito ka fire truck, inabagan sa walo ka fire truck volunteers ang nagtinabangay sa pagpasirit sa tubig. Si Chief Insp. Virginia Toledo, ang Chief Operation ug (Officer-in-Charge) OIC sa Cebu City Fire Department nagkanayon nga giisa nila sa Task Force Alpha ang maong sunog gumikan sa ka peligro sa maong dapit.

Ang kabaga sa aso didto sa sulod nakahatag og kalisod sa mga bombero kay dili na sila makaginhawa.

Hinuon mapasalamaton ang kabomberohan kay wala makakaylap ang kayo ngadto sa uban pang mga edipisyo nga kasikbit sa maong sinehan. Ang tag-iya sa maong building nga si Wendel Yulo nga gikahinabi sa mga tigbalita nagkanayon nga basi sa iyang nahibaw-an ang kayo didto magsugod sa bodega sa mga DVD sa usa niya ka tenant nga Muslim. – BANAT NEWS