Sakop sa MMT nanikas taktakon

CEBU, Philippines - Wala malipay si Mayor Tomas Osmeña sa taho nga dunay sakop sa Mayor’s Management Team (MMT) nga mihimo og kahiwian sa City Hall.

Kini bisan pa man kun ang dul-an sa usa ka gatus ka mga sakop sa MMT iyang gipasigarbo tungod sa giingong kalantip sa mga salabutan niini.

Ang MMT nga si Russel Pernitez nasakpan nga mipanso sa Daily Time Record (DTR) sa iya usab nga kaubang MMT nga si Chantele Decina.

Naaktuhan si Pernitez sa usa sa mga sakop sa Civil Security Unit (CSU) nga si Allan Rubi sa dihang gipanso niini ang DTR ni Decina sa bundy clock.

Alang kang Osmeña, dili niya mapasaylo ang maong matang sa buhat tungod kay kini giingong usa ka matang sa pagpangawat.

Una nang gipadayag ni City Attorney Joseph Bernaldez nga ang pagpanso sa DTR sa ubang kawani matawag nga usa ka matang sa dishonesty.

Matud ni Osmeña nga pagkatangtang sa trabaho ang bugti sa maong kahiwian ug maoy iyang gusto nga mahitabo kang Pernitez kung mapamatud-ang sad-an.

“As far as I’m concerned, acts of dishonesty is termination, anything that amounts to stealing, I consider this as stealing, deserves termination,” nagkanayon si Osmeña.   

Nasayran nga gipadala na ngadto sa City Legal Office ang kaso batok sa nahisgutang MMT alang sa imbestigasyon nga ipahigayon.

Dunay mga pagduda nga dapin-an ang himuong pakisusi tungod kay ang gitahasan sa pag-imbestigar niini usa usab ka kanhi sakop sa MMT.

Masaligon hinuon si Osmeña nga patas ang himuong imbistigasyon ug dili modupa ang imbistigador sa dili maayong buhat sa kanhi kauban niini.

“We will see, we will give her a chance to police themselves but I strongly believe that they will not tolerate and protect each other,” sumala ni Osmeña.

Nasayran nga si Pernitez ug Decina pulos nadestino sa Cebu City Medical Center nga maoy dugukan sa mga pagsaway sa mayor niining panahona. - Elly Bolonos (BANAT NEWS)