Mga suspek sa P6M rob-try gikasuhan

CEBU, Philippines - Gipasaka na sa kapulisan sa dakbayan sa Sugbu kagahapon ang kasong robbery batok sa lima ka suspetsadong mitulis sa jewelry dealer nga si Jennifer dela Cerna niadtong milabay’ng adlaw diha sa barangay Mambaling ug nabawi ang P6.2 milyones nga mga alahas.

Ang lima nga gipasakaa'g kaso mao sila si Noel Davis, Frederick Ybañez, Jeromy Polistico, Kirby Abanilla, ug Jennifer Enriquez kinsa maoy gitumbok nga dugay nang kliyente sa biktimang si dela Cerna.

Si Sr. Supt. Patrocinio Comendador, director sa kapulisan sa dakbayan sa Sugbu nagkanayon nga ilang gilakip sa pagpasaka’g kasong robbery si Enriquez isip principal by direct participation sa krimen.

Matud pa ni Comendador nga ilang naestablisar nga nalambigit gyud si Enriquez base sa ilang mga ebidensyang gihuptan gikan sa ilang sibilyang testigo ug sa extra-judicial confession ni Ybañez.

Isunod unya nila pagpasaka sa kaso ang at-large nga si Junjun Gamanay kinsa daling nakasibat human sa pagpanulis, samtang ila pang gitun-an ang pagpasaka’g kaso batok ni Quimada ingon man sa abogado niini. Samtang gipahibalo ni Mayor Tomas Osmeña nga mas dako untang ganti ang iyang ihatag kun ilang napatay ang mga tulisan atol sa hitabo, apan bisan paman misaad kining dako gyud ang ganting iyang itagana sa mga nakadakop.

“Crime is committed by a very small number of people but they commit it oftentimes, so we think that there is a complete breakdown of peace and order,” pasabot pa sa mayor. – BANAT NEWS