Gov. Garcia giimbitar ni "Terminator"

CEBU, Philippines - Ang international actor ug gobernador sa California, USA nga si Arnold Schwarzenegger mao mismong midapit ni Governor Gwendolyn Garcia aron kini patambungon sa 2nd Governors Global Climate Change Summit.

 Ang maong imbitasyon ni Gov. Schwarzenegger gipaagi sa email ug nadawat sa gobernadora karong semanaha.

 Si Garcia nagkanayon nga nasibot siya sa pagsanong sa imbitasyon ni Schwarzenegger sa pagtambong sa 2nd Governors Global Climate Change Summit nga gi-host sa California uban ang US governors ug UN development program karong Septiyembre 30 hangtud sa Oktobre 2 ning tuiga.

 Iyang giisip ang imbitasyon nga usa ka talagsaong kahigayunan tungod kay nagpakita man kini og tilimad-on nga na-recognized ang paningkamot sa iyang administrasyon sa pagprotiher sa kalikupan nga sukwahi kaayo sa mga pagsaway sa pipila ka mga nagpailang mga environmentalist.

Si Schwarzenegger nga usa ka Austrian-born apan diha magpuyo sa US misikat kaniadto dihang midaog kining Mr. Olympia, misikat sa Hollywood ug nagbida sa daghang mga pelikula lakip na ang “Terminator.”

 Sa pagkakaron ang gobernadora nihan-ay na karon sa iyang schedule sa bulan sa Septiyembre ug Oktobre aron lamang pagseguro nga makatambong siya sa maong international nga kalihukan.

 Ang gobernadora nagtuong ang kagamhanan sa lalawigan sa Sugbu may matampo nga maayong mga pamaagi alang sa pagprotektar sa kalikupan ug kaminusan ang problema sa climate change.

 Sigon pa sa gobernadora nga ang maong summit nga nagtinguha sa pagkuha og hiniusang commitment sa mga government corporations, non-profit organizations ug academic institution alang sa pagpanalipod ug pag-amping sa kalikupan dungan sa kalamboan sa ekonomiya sa kalibutan.

Ang maong kalihukan pagatambongan sa mga gobernador sa Estados Unidos ug sa uban pang mga kanasuran ug usa na niini ang probinsiya sa Sugbu. – BANAT NEWS