CCMC pasirad-an

CEBU, Philippines - Gibaharan sa Department of Health (DOH)-7 nga tangtangan sa lisensya ug sirad-an ang Cebu City Medical Center (CCMC) kundili kini modawat og mga pasyente nga gikan sa kalungsoran.

Kini ang pasidaan ni Regional Director Susana Madarieta sa DOH-7 kinsa nagkanayon nga kun magpadayon pagtuman ang mga kawani sa CCMC sa mandar ni Mayor Tomas Osmeña nga hinginlan ug dili dawaton ang masakiton gikan sa kalungsoran, peligro kaayong mahunong ang operasyon sa maong tambalanan.

Kini tungod kay tataw kaayo ug tin-aw pa sa udtong tutok ang balaod nga mao ang Republic Act 8344, nga nagmando nga tanang mga pasyente nga anaa sa talandugon ang kahimtang dili gyud balibaran sa hospital ug ang tambalanang molapas niini matangtangan sa lisensya.

 Hinuon si Osmeña kinsa suhito usab kaayo sa balaod nagkanayon nga wala siya'y nalapas nga balaod kun matag pasyente nga gikan sa lungsod nga ihatod nganha sa CCMC ipahakot   niya ngadto sa opisina ni Gobernador Gwendolyn Garcia aron adto didto   patambali. – BANAT NEWS