CEBU, Philippines – Mitingog na gyud si kanhi konsehal ug karon barangay kapitan sa Basak-San Nicolas barangay Kapitan George Rama ug gidepensahan ang iyang ig-agaw'ng si Bise Mayor Michael Rama gikan sa walay hunong nga pagpangatake ni Mayor Tomas Osmeña.
Matud pa ni Kapitan Rama nga dili gyud mahitabo ang pasangil sa mayor nga si kanhi konsehal Jocelyn Pesquera nga gidungog nga hinigugma sa bise mayor maoy magbuot unya sa Cebu City Hall kun mapili pagkamayor si Rama karung 2010 eleksyon.
Kini tungod kay matud pa ni kapitan Rama, abogado ang iyang ig-agaw ug nakasiguro siyang dili gyud kini magpa-under ni Pesquera sa higayon nga duna kini pagahimuon.
Dako sab hinuon ang pagtuo ni kapitan Rama nga dili magduha-duha ang iyang ig-agaw pagbiya ni Pesquera kun mahitabo ugaling nga mao unya kini magbuot diha sa city hall kun mapili na kining mayor.
Gihimong sanglitanan sa kapitan ang panagbuwag ni Rama ug sa asawa niini kaniadto.
Sa iyang bahin, si Pesquera mipasalig nga dili siya mobiya ug padayon gihapon siyang mosuporta sa mga kandidato sa Bando Osmeña Pundok Kauswagan (BOPK) bisan pa ning labing uwahing pagpangatake ni Mayor Osmeña batok kaniya.
Si Pesquera nga maoy gidungog nga hinigugma sa bise mayor mipadayag nga determinado na gyud si Rama nga molansar pagkamayor ubos sa BOPK human sa pagkapupos sa termino ni Osmeña. – Rey Pasaporte (BANAT NEWS)