Motorsiklo nadasmag 1 patay

CEBU, Philippines – Patay ang usa ka lalaki human mabangga ang motorsiklong ilang gisakyan sa gutter sa karsada sa Tupas St. sa barangay Suba siyudad sa Danao niadtong Martes sa alas 11:35 sa gabii.

Ang namatay mao si Jovencio Banson, 54, samtang naangol ang drayber sa motorsiklo nga si Jonie Almojen, 18, pulos molupyo sa nahisgutang lugar.

Matud pa ni SPO1 Renante Manulat, imbestigador sa Danao City Police dihang nahinabi sa Banat News nga ang mga biktima sakay sa motorsiklo paingon sa bukirang bahin sa siyudad sa Danao ug pag-abot nila sa nahisgutang lugar nasipyat og karkulo ang drayber sa likuong bahin ug aksidenteng nibangga sa gutter.

Tungod niini wala na makontrol sa drayber ang motorsiklo nga nisampot sa ilang pagkalamba ug ang mga sakay pulos nalabay ug ang namatay giingong mitugpa nga una ang ulo.

Daling gihatod ang mga biktima sa Danao District Hospital apan gideklarar nga dead on arrival si Banson samtang human masutang luwas na ang drayber boluntaryo kining mitahan sa kapulisan.

Dugang nahipos nga impormasyon sa kapulisan nga ang mga biktima pulos kini nakainom nga nagmaneho atol sa hitabo. – Darrel Carumba uban sa report nila ni Bong Soriano ug Romeo Limpangog (BANAT NEWS)