CHR-7 mosusi sa pagtanggong sa Talisay police sa biktima sa 'illegal detention'

CEBU, Philippines – Ang Commission on Human Rights kon CHR-7 andam nga mopahigayon og imbestigasyon labot sa giingong pagsakop og pag-hold sa kapolisan sa Talisay nga walay warrant of arrest niadtong alas 9:00 sa gabii adlaw nga Domingo hangtud na sa sayo sa kaadlawon sa adlaw’ng Lunes.

Si Atty. Primo Cadampug ang hepe sa legal section sa CHR-7 nga nahinabi sa DyRF nagkanayon nga kwestiyonable ang pagsikop ug labaw na ang pag-hold sa kapolisan sa siyudad sa Talisay ngadto kang Jill Sudaria, 23, taga barangay Kal-anan, Tabogon.

Si Sudaria trabahante sa Sola Homes El Paradiso nga mireklamong gi-hold sa iyang agalong German national tungod sa pasangil nga pagkawagtang sa ilang kinitaang P120 mil.

Apan gumikan sa reklamong illegal nga gitanggong ang dalaga gibuhian kini sa maong langyaw, apan nianang pagkagabii nagpa-blotter ang agalon niini sa kapolisan sa Alcoy kabahin sa nawagtang nga salapi. Gipasabot ni Cadampug nga ang flash alarm sa Mobile Patrol Group sa siyudad sa Sugbu dili paigong basehanan aron tanggungon si Sudaria.

Sa iyang bahin, si Sudaria nagkanayon nga mupasaka gyud siya og kasong arbitrary detention batok sa mga polis sa Talisay ingon man illegal detention batok sa iyang amo nga sila si Dr. Jurgen Rilling, usa ka German national ug ang Pilipinang asawa nga si Gina Mahinay.

Iyang gipanghimakak ang mga alegasyon ni Dr. Rilling ug Mahinay bahin sa kuwarta.

Apan si PO2 Roelito Tano sa Talisay Police Station nagkanayon nga mga pasado alas 7:00 sa gabii niadtong Domingo nakadawat sila og flash alarm gikan sa Cebu City Mobile Patrol nga ipa-hold ang taxi nga nagtangag sa plakang YGE-415 tungod kay mao kini ang gisakyan sa suspek sa swindling-estafa.

Mga ala 1:30 sa kaadlawon niadtong Lunes si Sudaria gikuha sa mga polis sa Alcoy nga gipangulohan ni PO3 Eduardo Santander gikan sa TCPS.

Sa laing bahin, si Superintendent Henry Binas, hepe sa TCPS nagkanayon nga mopahigayon siya og imbestigasyon sa maong insidente. – Chester Abadilla uban sa report ni Brenda Batuto (BANAT NEWS)