Koryana gikawatan

CEBU, Philippines – Koreyanong giingong nangabang og batan-ong babae nabiktima hinuon sa naulahi dihang gikawat ang iyang salapi sulod sa gi-check inan nilang pension house diha sa Humayhumay barangay Gun-ob dakbayan sa Lapulapu.

Ang biktima mao si An Uk, usa ka Korean national nga kasamtangan nagpuyo sa Kinner Hills Condominium sa sitio Matumbo barangay Pusok dakbayan sa Lapulapu.

Sa imbestigasyon ni SPO1 Danilo Aying sa Crime Against Property (kanhi TRS) sa kapolisan sa Lapulapu nasayran nga human nakakuha og batan-ong babaye si An gikan sa usa ka bugaw sa maong dapit iya kining gidala sa usa ka pension house sa maong dapit.

Ang maong Koryano naligo una diha sa banyo ug wala makabantay nga nahibalo ang maong babaye kung asa gibutang ang iyang pitaka nga diha sa ilawom sa kutson sa kama niini.

Pipila ka minutos human maligo nahibulong nalang kining wala na diha ang babaye ug sa iyang pagsusi sa iyang pitaka ilawom sa kutson wala na ang sulod niining 300 dolyares niini.

Ang biktima igo nalang nagpa-blotter sa kapolisan aron pagpatabang aron masikop ang maong babaye. – Bong Soriano (BANAT NEWS)