CEBU, Philippines – Miduaw kagahapon sa buntag ang bag-ong nakabalik og lingkod nga mayor sa lungsod sa Tudela nga si Mayor Rogelio Bacquerfo ngadto sa buhatan ni Governor Gwendolyn Garcia.
Nagdikidiki unta sa pagsulod si Bacquerfo sa opisina sa gobernadora apan personal gyud kining giabi-abi ni Garcia dungan sa pamahayag nga “walay personalan, trabaho lang.”
Si Garcia miingon nga dili siya manghilabot sa internal nga problema sa maong lungsod bisan pa man nga dili kaalyado si Mayor Bacquerfo.
Tungod niini ang gobernadora mipasalig kang Bacquerfo nga makapaabot ang lungsod sa Tudela og mga hinabang, proyekto ug programa gikan sa probinsiya.
Sa iyang bahin, si Bacquerfo nisaad usab atubangan sa gobernador nga makighiusa usab siya sa ubang mga opisyales sa iyang lungsod pinaagi sa pag-adto gyud sa konseho sa Tudela nga gipangulohan ni Vice Mayor Clint Maratas.
Dugang pa ni Bacquerfo nga dako gyud ang kadaut sa lungsod nga nahimo sa politikanhong panagbingkil nila ni Demetrio Granada apan iyang gipanigurong may mahimo pa siyang kalambuan sa dili pa ang election. – Chester Abadilla (BANAT NEWS)