Kapitan sa Canjulao gireklamo

CEBU, Philippines – Gipasakaan og duha ka kaso ngadto sa Visayas Ombudsman ang kapitan sa Barangay Canjulao dakbayan sa Lapulapu human pasanginling namaligya og puthaw nga iya sa gobiyerno ug sa kapakyas niini paghatag sa husay sa ilang proyektong "Abag Silingan" sa maong barangay.

Gipasakaan og kasong malversation of government property si Canjulao kapitan Rufo Bering nila ni Florencio Berame ug Mario Manuel mga residente sa maong barangay.

Ang duha mipasangil kang Bering nga mibaligya sa puthaw nga railings sa dalan, puthaw sa gubaon nga tents, tangke sa tubig nga stainless ug uban pa apan ang halin wala mapunta sa panudlanan sa barangay.

Ang mga reklamante nangangkong ilang nakit-an pagkarga sa trak sa maong mga butang ug gidala sa junk shop.

Samtang laing kasong gross misconduct ang gipasaka nila ni Canjulao barangay kagawad Magdalena Perodes, Oscar Godines ug Marcos delos Santos Jr. mga kaalyado kanhi ni Bering gumikan sa kapakyas sa ilang kapitan paghatag sa husay ngadto kanila sa kinitaan sa "Abag Silingan."

Ang Abag Silingan, usa ka proyekto sa barangay nga naghatag og benipisyo sa mga miyembro panahon nga adunay masakit ug mamatay sa ilang barangay pinaagi sa P10 matag bulan nga amutan.

Si Bering nga nahinabi sa Banat News mihimakak sa maong mga alegasyon, matud niini daghan na ang nakabenipisyo sa “Abag Silingan” ug ang kabahin sa pagpamaligya og puthaw hugot gihapon niya kining gipanghimakak ug andam niyang atubangon.

Nagduda si Bering nga ang pagpasaka og kaso batok kaniya mimugna sa kampo ni Lapulapu City Mayor Arturo Radaza nga tumong mao ang pagguba sa iyang kredibilidad. – BANAT NEWS