Tulisan gipusil sa polis

CEBU, Philippines - Nalandig sa tambalanan ang usa ka gipasanginlang tulisan human mapusili sa polis nga iyang gitulis ug nasikop usab kini lakip na ang iyang kauban human mianha sa Talisay City District Hospital aron magpatambal, ang insidente nahitabo niadtong Lunes sa gabii diha sa tulay sa Mananga, barangay Tabunok, dakbayan sa Talisay.

Ang biktima sa pagpanulis mao si PO2 Erwin Denila, taga barangay Linao, Talisay ug nadestino diha sa Talisay City Police Station kinsa gikan mibisita sa iyang ig-agaw ug amigong polis diha sa barangay Basak, Pardo, dakbayan sa Sugbo.

Ang mga suspek mao sila si Arche Villaflor taga sitio Mananga, Tabunok nga maoy napusilan ni Denila ug Alvin Veloso taga sitio Hollow Block, barangay Lagtang sa maong siyudad ug parehong 20-anyos ang panuigon.

Si Denila sa pakighinabi niini sa Banat News kagahapon mibutyag nga pasado alas 11:00 sa kagabii niadtong Lunes misakay siya og multicab nga pasaheroan gikan sa Basak paingon nang mopauli.

Matud niini nga wala siya makamatngon kung diin dapita misakay sa multicab ang duha ka tulisan tungod kay ang mga pasahero saka-kanaog man apan pag-abot diha sa lugar nga nahitaboan siya na lang ug ang mga tulisan ang nahibiling pasahero sa nahisgutang multicab.

Ang duha ka tulisan miduol kang Denila ug mipahibalong “hold up” ug dayong bunlot sa Motorola nga cellphone sa polis, tungod niini gibunlot og balik ni Denila ang iyang cellphone ug ning tungura samtang silang duha ni Veloso nagbinunlotay sa cellphone nagpunay usab og dunggab si Villaflor kaniya.

Tungod niini nabuhian ni Denila ang cellphone aron makasagang sa kutsilyo.

Usa sa mga tulisan ang giingong misulti pa nga “cellphone ray among tuyo.”

Ang duha ka tulisan ang daling mikanaog gikan sa sakyanan dihang ilaha nang nadagit ang cellphone sa polis apan gipusil sila ni Denila ug si Villaflor naigo sa walang kilid apan nakadagan gihapon kini.

Si Denila uban kang Allan Sellote, drayber sa nahisgutang multicab nga nagtangag sa plakang GWP-478 ug sa kundoktor nga si Nikko Demetrio ang mitaho diha sa TCPS sa barangay Poblacion.

Pila ka minuto ang milabay ang kapolisan nakadawat og tawag sa telepono gikan sa gwardiya diha sa Talisay City District Hospital kabahin sa usa ka tawong napusilan diha sa tulay sa Mananga, Tabunok.

Si Denila uban sa drayber ug kundoktor ug nila ni PO2 Leandro Azarcon ug PO2 Roy Sarsaba miadto sa nahisgutang tambalanan ug diha nila makit-i ang duha.

Apan ang cellphone sa polis ug ang kutsilyo nga gigamit sa tulisan sa pagdunggab wala na ma-recover.

Si Villaflor gibalhin ngadto sa Vicente Sotto Memorial Medical Center samtang si Veloso ang nagtingkagol diha sa Talisay City detention cell.

Ang duha ang gikatakdang pasakaan og kasong robbery diha sa piskaliya sa siyudad. – BANAT NEWS