Amahan gitabangag puspos sa mga anak namatay

CEBU, Philippines – Gitabangan og kulata ug gipusposan sa managsuon ang ilang amahan hinungdan nga nakuyapan hangtod namatay gumikan sa paglaban sa ilang inahan nga giingong gikulata sa amahan diha sa sitio Banika barangay Logo sa lungsod sa Borbon niadtong Domingo sa alas 6:00 sa sayong kagabhion.

Patay nang nahidangat sa tambalanan mao si Felix Sinilong, 54, mag-uuma ug molupyo sa nahisgutang lugar, samtang ang suspek mao ra usab ang iyang duha ka anak nga sila si Ronald Sinilong, 26, ug Jomar, 24 , nagpuyo ra usab sa maong lugar.

Matud pa ni PO3 Edgar Novabos sa Borbon Police dihang nahinabi sa Banat News sa sayo pa niana nag-away ang biktima ug ang inahan sa mga suspek nga si Laurita, 44, tungod kay hubog nang nakauli ang biktima ug naabot sa kahimtang sa ilang panalapi ang ilang lalis.

Gumikan sa kahubog ug kasuko gikulata sa biktima ang iyang asawa ug gipuspusan og kahoy ang nawong sa ginang hangtud nga nalup-og.

Ang mga anak nga nakakita sa pagkalup-og sa ilang inahan apan padayon gihapong gibunal-bunalan sa ilang amahan dali nila kining gitabangan apan sila na usab ang gisuwayan og bunal sa kahoy sa biktima.

Hinungdan nga ilaha kining gisuklan ug gipatidpatiran ug gisukmag hangtud nga nabuhian niini ang gikuptang kahoy ug maoy ilang gigamit pagpuspos niini ngadto sa ulo ug lawas sa ilang amahan hangtud nga nakuyapan.

Gisuwayan pa unta og dala ang biktima sa Juan Dosado Memorial Hospital sa barangay Damolog apan gideklarar kining dead on arrival.

Samtang ang mga suspek boluntaryong mitahan sa kapulisan human sa hitabo ug sa paghimo ning balita matud ni PO3 Novabos gipaabot pa nila ang kabanay sa biktima alang sa pagpasaka og kasong parricide sa duha. – Darrel Carumba (BANAT NEWS)