Dalaw sa Mandaue City Jail gidili

CEBU, Philippines – Gidili una karon sa kadagkoan sa Bureau of Jail Management and Penology-7 ang mga ‘dalaw’ sa Mandaue City Jail samtang gihigpitan ang pagpalimpyo sulod sa maong bilanggoan human sa ‘flu outbreak’ nga miigo niadtong Biyernes.

Pabilin pang giobserbahan sa Department of Health ang 28 ka mga pinirisong mao nalay nagpabiling gipanghilantan sulod sa Mandaue City Jail sukad niadtong milabay'ng Biyernes.

Gawas sa 28 ka bilanggo, higpit nga gi-monitor ang panglawas sa 61 ka mga pinirisong adunay mga nagkalain-laing sakit susama sa hubak, tuberculosis ug uban pang klase sa sakit nga naa diha sa maong bilanggoan.

Matud pa sa tigpamaba sa DOH-7nga si Dr. Cora Lou Kintanar nga gipanghatagan na og mga bitamina C ang mga piniriso aron mapalig-on pa ang ilang resistensya batok sa mga sakit ilabi na sa mga sakit nga flu.

Gipaabot nga mogawas na ang resulta sa swab test sa unom ka mga gikuhaag sample nga mga gipanghilantang bilanggo karong adlawa ug ugma.

Kahinumduman nga naalarma ang kadagkuan sa Mandaue City Jail human hilanti ang 177 ka bilanggo.

Si BJMP-7 Community Relations Service chief, Sr. Insp. Mary Jane Inopia nagkanayon nga ang gitugutan lang unang makabisita karon mao ang mga doctor ug mga manlalaban sa mga priso. – Edwin Ian Melecio uban sa report ni Johar Lapasaran (BANAT NEWS)