CEBU, Philippines – Gidayeg sa katawhan ang mga opisyal sa dakbayan sa Mandaue kay matud pa “tawo” gyud itandi sa mga opisyal sa dakbayan sa Sugbu nga “may pagkahayop” kuno kun hisgotan ang isyu bahin sa tambalanan nga modawat og pasyente gikan sa kalungsoran.
Kini sa dihang gibutyag ni Vice Mayor Carlo Fortuna nga sukad pa kaniadto ang Eversely Child Sanitarium General Hospital sa barangay Jagobiao, ug ang Mandaue District Hospital nanawat kini og pasyente bisan diing lugara sa lalawigan.
Miingon si Fortuna nga gigahinan gyud ni Kongresista Nerissa Soon Ruiz og minilyon ka pesos nga pundo matag tuig ang duha ka hospital aron manawat kini og mga pasyente nga walay pagpinig sa ilang pagkatawo, relihiyon ug dapit nga gipuy-an.
Maoy hinungdan nga sa dihang nasayran nila ang nabaniog nga bahad ni Mayor Tomas Osmeña sa dakbayan sa Sugbu nga kutob sa pasyente sa lungsod nga moanha sa CCMC iyang ipahakot ngadto sa opisina ni Gobernador Gwendolyn Garcia, nahingangha ang taga Mandaue ug giisip nila nga tawo gyud ang taga Mandaue og hunahuna itandi sa taga dakbayan sa Sugbu kun hisgotan ang bahin sa pag-atiman og masakitong tawo. – BANAT NEWS