Motor milupad mitugpa sa sapa

CEBU, Philippines - Mitimpasaw sa sapa ang usa ka Amerikano ug kaubang Cebuana niini diin sila mitugpa samtang nagsakay sa milupad nilang motorsiklo paglabang nila sa taytayan sa barangay Guinsay, dakbayan sa Danao sa miaging kaadlawon.

Ang mga biktima mao si Temothy Debisschop, 30, ug ang iyang backrider nga giila lang sa ngalang Hanna nga taga Guinsay.

Matud pa ni SPO1 Reynante Manulat sa Danao City Police Station nga nagbaguros sa kakusog ang motorsiklo nga gisakyan sa mga biktima paingon sa Poblacion, Danao dihang pag-abot nila sa taytayan sa Guinsay wala na kakontrol ang Kano sa iyang motorsiklo busa milupad kini ug didto na motugpa sa sapa.

Hinuon wala mabali ang ilang kalawasan kay tubig may natugpahan nila. (BANAT NEWS)