CEBU, Philippines – Iduso ni Cebu City Councilor Arsenio Pacaña nga maestablisar na ang rota sa Heritage Tour sa dakbayan sa mosunod nga mga adlaw.
Gusto ni Pacaña nga mamahimo nang institusyon sa siyudad ang Heritage Tour sa dili pa matapos ang iyang termino sunod tuig. Ang konsehal nga maoy chairman sa Committee on Tourism sa City Council anaa na sa iyang ikatulo ug katapusang termino.
Matud pa ni Pacaña nga ila nang nasugdan paghan-ay ang rota sa Heritage Tour ug iyang gitinguha nga kini maestablisar na.
Gani miingon ang konsehal nga makatulo na sila makasuroy sa rota sa Heritage Tour uban sa pipila ka mga bisita gikan sa laing dapit. “Ang pag-put in place na lang aning tanan maoy kulang para nga ang iyang rota ma-establish gyud ug ma-institutionalize ba,” nagkanayon si Pacaña.
Ang Heritage Tour mao ang pagsuroy sa giilang mga landmarks sa dakbayan nga nahimo nang tipik sa kasaysayan sa Sugbu ug sa nasod.
Kini sama sa Fort San Pedro, Magellan’s Cross, Cebu Metropolitan Cathedral (museum), Colon Street Marker, Heritage Monument ug uban pa.
Gisugyot ni Pacaña nga ang Heritage Tour himuon lang matag Sabado ug Domingo sa gabii nga dili daghan ang mga sakyanang managan.
Tartanilla maoy giingon ni Pacaña nga pasakyan sa mga bisita nga mosuroy sa mga historical landmarks dinhi sa dakbayan matag semana.
Nagtuo ang konsehal nga daghan ang madani pagsuroy sa makasaysayanong mga dapit sa siyudad kung maestablisar na ang Heritage Tour.
Partikular na niini ang mga lokal ug langyaw’ng mga turista lakip na ang mga Sugbuanon mismo nga gustong molab-as sa kagahapon sa Sugbu. – Elly Bolonos (BANAT NEWS)