Payag-payag gidaro sa patrolcar

CEBU, Philippines – Nagusbat ang atubangang bahin sa patrolcar sa kapulisan sa Compostela human malahos ug nadaro ang usa ka payag atol sa ginukdanay nila sa mga tulisan niadtong milabay’ng kaadlawon sa National Highway barangay Magay, sa nahisgutang lungsod.

Si PO1 Lauro Laurel, desk officer sa Compostela Police Station nga gikahinabi sa Banat News nagkanayon nga si PO2 Richelio Ayuda maoy nagmaneho sa Hilux Patrol Car niadtong tungura.

Matud pa ni PO1 Lauro Laurel nakadawat sila og reklamo gikan nila ni Rodney Casil, 25, ug Kim Libres, 23, human gitulis sa duha ka mga suspetsadong nagsakay og motorsiklo.

Si PO2 Richelio Ayuda ug SPO1 Enrique Los Baños uban ang mga biktima daling misakay sa Toyota Hilux patrolcar ug migukod sa mga tulisan diha sa maong dapit.

Apan gikatahong sa tanto nilang padagan dihay usa ka tawong kalit nga nilabang sa dalan hinungdan nga milihay si PO2 Ayuda apan wala na makabawi sa manobela ug nalahos pagdaro sa walay nagpuyong payag daplin sa dalan.

Nasayran nga P4,700 mil nga cash sa mga biktima ingon man duha ka mga cellphones ang nadala sa mga tulisan niadtong tungura.

Niadtong milabay’ng adlaw duha usab ka mga tulisan ang mitulis sa usa ka salesman sa Catmon ug laing salesman sa Liloan, gituohan sa kapolisan nga usa ra ka grupo ang mihimo niini.

Gumikan niini, gialerto ni Sr. Supt. Jesus Gaquing ang Task Force Motorsiklo pag-abag sa lokal nga kapolisan paggukod sa mga tulisang magmotor samtang gimandoan na ang Provincial Intelligence Branch sa pagsubay sa mga tawong dunay record sa pagpanulis sa kalungsoran. – Guam Logroño (BANAT NEWS)