CEBU, Philippines - Gihulagway sa kahugpungan sa mga mayor sa tibuok Sugbo nga imoral ug dili makatawhanon ang desisyon ni Mayor Tomas Osmeña pag-abog paingon sa Kapitolyo sa mga pasyente nga taga probinsya nga anha magpatambal sa Cebu City Medical Center (CCMC).
Mao kini reaksiyon ni Mayor Cesar Barricuatro sa Dumanjug ug kasamtangang presidente sa Municipal Mayors League, Cebu Chapter human sa giluwatang pamahayag ni Osmeña nga magbutang siya og standby multicab sa CCMC aron mohakot paingon sa buhatan ni Gobernador Gwendolyn Garcia sa Kapitolyo sa mga pasyente gikan sa probinsiya nga anha magpatambal sa CCMC.
Nagtuo hinuon ang mayor nga posibleng nakasulti lang niini si Osmena tungod sa ilang walay hunong nga personalan nga away tali sa gobernador.
Alang ni Baricuatro dili kaayo kini makaapekto ilabina kay kadaghanan sa mga pasyente nga taga probinsya ang anha man gyud kini magpatambal sa Vicente Sotto Memorial Medical Center (VSMMC).
Apan dunay mga taga probinsya nga anha magpatambal sa CCMC apan dugay na kini nga ania manimuyo sa dakbayan ug gani sagad nila mibalhin na og parehistro dinhi.
Si Osmeña mipalanog sa iyang pag-abog sa mga pasyente sa probinsya nga dili na makapa-admit sa CCMC gawas lang sa emergency cases agi og tubag niya sa gipalanog ni Garcia atol sa state of the province address (SOPA) niini nga mipahibalo sa dakong nahipos nga pundo sa probinsya ubos sa iyang administrasyon nga walay utang sukwahi sa dakbayan sa Sugbo. – BANAT NEWS