Ex-convict gitabanga'g pusil patay

CEBU, Philippines - Patay ang usa ka giingong ex-convict human kini tabangi og pusil sa duha ka wala mailhing mga lalaki nga pulos nagtaptap sa nawong kagahapon sa kaadlawon diha sa barangay Lawaan II, dakbayan sa Talisay.

Ang biktima giila ni PO2 Lino Diez sa Talisay City Police Station nga si Randy Caballero, 34, residente sa sitio Mananga II, barangay Tabunok sa nahisgutang siyudad.

Si Caballero kinsa nakaangkon og mga samad pinusilan sa ulo, nawong ug lawas daling gidala sa iyang higala nga si Arvin Fernandez ngadto sa Talisay City District Hospital apan wala na kini makaabot nga buhi diha sa maong tambalanan.

Sa pasiunang imbestigasyon ni Diez nasuta nga si Caballero ang napriso tungod sa kaso sa drugas ug bag-ohay lang kining nakagawas gikan sa Talisay City Jail.

Sa wala pa mahitabo ang insidente si Caballero ug Fernandez   nag-inom uban sa lain nilang mga higala   duol sa balay sa biktima.

Si Fernandez ang nananghid sa amahan ni Caballero nga mamalhin sila og inom ngadto sa usa ka videoke bar duol sa iyang balay.

Samtang ang grupo diha na sa videoke bar padayon sa ilang inom kalit lang mibutho ang duha ka mga lalaking nagtabon sa ilang mga nawong ug walay pangutana gipauwanan og bala ang biktima.

Matud ni Diez nga nakadagan pa si Caballero bisan og naigo na kini sa bala ug nakatabok pa sa karsada diha sa nahisgutang lugar apan gituohang na-slide kini tungod kay dulhogon man ang lugar hinungdan nga natumba diha sa karsada ug giduol sa mga mamumuno ug gitiwasan. – BANAT NEWS