City Jail naniid sa A(H1N1)

CEBU, Philippines - Gawas sa hugot nga pagbantay sa mga piniriso gihugtan usab sa Cebu City Jail ang pagpatuman og mga lakang batok sa sakit nga Influenza A (H1N1) flu.

Matud pa ni City Jail Warden Supt. Efren Nemenio nga estrikto nilang gipatuman ang monitoring sa mga dalaw sa bilanggoan gamit ang duha ka thermal equipment pagsuta sa body temperature sa mga tawong mobisita sa mga binilanggo. Gawas niini miingon si Nemenio nga ipaubos usab sa interview ang mga dalaw ug kini dili pasudlon kung giubo ug gisip-on ug gipanghilantan.

“Lisod man gyud kaayo kay once nga masudlan ta ana nga sakit, problema gyud kay confine gud ta diha, hurot gyud nang tanan,” sumala ni Nemenio.

Gipahibawo usab sa Jail Warden nga kanunayng gimonitor sa ilang health officer ang mga inmates kung kinsa ang nangasakit niini. Giangkon ni Nemenio nga duna nay mga binilanggo diha sa City Jail nga gipanghilantan apan kini giingong mga seasonal flu lang.

Ang Vicente Sotto Memorial Medical Center maoy gitahasang modawat sa mga kaso sa A(H1N1). Una nang gimando sa kadagkuan sa Bureau of Jail Management and Penology (BJMP) ngadto sa tanang bilanggoan lukop nasud nga estriktong ipatuman ang mga preventive measure batok sa nahisgutang sakit. - Elly Bolonos (BANAT NEWS)